علامہ اقبال ؒ سے منسوب وہ اشعار جو علامہ اقبال کے ہے ہی نہیں

 

علامہ اقبال ؒ سے منسوب وہ اشعار جو علامہ اقبال کے ہے ہی نہیں

انٹرنیٹ کی دُنیا میں اور بالخصوص فیس بُک اور یو ٹیوب پر اقبال کے نام سے بہت سے ایسے اشعار کا شتراک ہو رہا ہے جن کا اقبال کے اندازِ فکر اور اندازِ سُخن سے دُور دُور کا تعلق نہیں۔ کلامِ اقبال اور پیامِ اقبال سے محبت کا تقاضا ہے، اور اقبال کا حق ہے کہ ہم ایسے اشعار کو ہرگز اقبال سے منسوب نہ کریں جو اقبال نے نہیں کہے۔ ذیل میں ایسے اشعار کی مختلف اقسام اور مثالیں پیشِ کی جاتی ہیں :

پہلی قسم ایسے اشعار کی ہے جو ہیں تو معیاری اور کسی اچھے شاعر کے، مگر اُنھیں غلطی سے اقبال سے منسوب کر دیا جاتا ہے۔ ایسے اشعار میں عموماََ عقاب، قوم، اور خودی جیسے الفاظ کے استعمال سے قاری کو یہی لگتا ہے کہ شعر اقبال کا ہی ہے۔ مثالیں :

تندیِ بادِ مخالف سے نہ گھبرا اے عقاب

یہ تو چلتی ہے تجھے اونچا اڑانے کے لیے

نا معلوم

اسلام کے دامن میں اور اِس کے سِوا کیا ہے

اک ضرب یَدّ اللہی، اک سجدہِ شبیری

نا معلوم

خدا نے آج تک اس قوم کی حالت نہیں بدلی

نہ ہو جس کو خیال آپ اپنی حالت کے بدلنے کا

نا معلوم

پھر ایسے اشعار ہیں جو ہیں تو وزن میں مگر الفاظ کے چناؤ کے لحاظ سے کوئی خاص معیار نہیں رکھتے یا کم از کم اقبال کے معیار/اسلوب کے قریب نہیں ہیں۔ مثالیں :

عشق قاتل سے بھی مقتول سے ہمدردی بھی

یہ بتا کس سے محبت کی جزا مانگے گا؟

سجدہ خالق کو بھی ابلیس سے یارانہ بھی

حشر میں کس سے عقیدت کا صلہ مانگے گا؟

نا معلوم

 

تِری رحمتوں پہ ہے منحصر میرے ہر عمل کی قبولیت

نہ مجھے سلیقہِ التجا، نہ مجھے شعورِ نماز ہے

نا معلوم

سجدوں کے عوض فردوس مِلے، یہ بات مجھے منظور نہیں

بے لوث عبادت کرتا ہوں، بندہ ہُوں تِرا، مزدور نہیں

نا معلوم

بعض اوقات لوگ اپنی بات کو معتبر بنانے کے لیے واضح طور پر من گھڑت اشعار اقبال سے منسوب کر دیتے ہیں۔ مثلاََ یہ اشعار غالباََ شدت پسندوں کے خلاف اقبال کے پیغام کے طور پر استعمال کیے جاتے ہیں جبکہ اِن کا اقبال سے دُور دُور تک کوئی تعلق نہیں۔

اللہ سے کرے دور ، تو تعلیم بھی فتنہ

املاک بھی اولاد بھی جاگیر بھی فتنہ

ناحق کے لیے اٹھے تو شمشیر بھی فتنہ

شمشیر ہی کیا نعرہ تکبیر بھی فتنہ

نامعلوم

اِسی طرح اقبال کو اپنا حمایتی بنانے کی کوشش مختلف مذہبی و مسلکی جہتوں سے بھی کی جاتی ہے۔ مثلاََ

پوچھتے کیا ہو مذہبِ اقبال

یہ گنہگار بو ترابی ہے

نا معلوم

وہ روئیں جو منکر ہیں شہادتِ حسین کے

ہم زندہ وجاوید کا ماتم نہیں کرتے

نا معلوم

بیاں سِرِ شہادت کی اگر تفسیر ہو جائے

مسلمانوں کا کعبہ روضہء شبیر ہو جائے

نا معلوم

نہ عشقِ حُسین، نہ ذوقِ شہادت

غافل سمجھ بیٹھا ہے ماتم کو عبادت

نا معلوم

قتلِ حسین اصل میں مرگ یزید ہے

اسلام زندہ ہوتا ہےہر کربلا کے بعد

 محمد علی جوہر 

پانچواں گروپ 'اے اقبال' قسم کے اشعار کا ہے جن میں عموماََ انتہائی بے وزن اور بے تُکی باتوں پر انتہائی ڈھٹائی سے 'اقبال' یا 'اے اقبال' وغیرہ لگا کر یا اِس کے بغیر ہی اقبال کے نام سے منسوب کر دیا جاتا ہے۔ اِس قسم کو پہچاننا سب سے آسان ہے کیونکہ اِس میں شامل 'اشعار' دراصل کسی لحاظ سے بھی شعری معیار نہیں رکھتے اور زیادہ تر اشعار کہلانے کے لائق بھی نہیں ہیں۔ مثالیں

کیوں منتیں مانگتا ہے اوروں کے دربار سے اقبال

وہ کون سا کام ہے جو ہوتا نہیں تیرے پروردگار سے؟

تیرے سجدے کہیں تجھے کافر نہ کر دیں اقبال

تُو جُھکتا کہیں اور ہے اور سوچتا کہیں اور ہے!

دل پاک نہیں ہے تو پاک ہو سکتا نہیں انساں

ورنہ ابلیس کو بھی آتے تھے وضو کے فرائض بہت

مسجد خدا کا گھر ہے، پینے کی جگہ نہیں

کافر کے دل میں جا، وہاں خدا نہیں

کرتے ہیں لوگ مال جمع کس لیے یہاں اقبال

سلتا ہے آدمی کا کفن جیب کے بغیر

میرے بچپن کے دِن بھی کیا خوب تھے اقبال

بے نمازی بھی تھا، بے گناہ بھی

وہ سو رہا ہے تو اُسے سونے دو اقبال

ہو سکتا ہے غلامی کی نیند میں وہ خواب آزادی کے دیکھ رہا ہو

گونگی ہو گئی آج زباں کچھ کہتے کہتے

ہچکچا گیا میں خود کو مسلماں کہتے کہتے

یہ سن کہ چپ سادھ لی اقبال اس نے

یوں لگا جیسے رک گیا ہو مجھے حیواں کہتے کہتے

تم حیا و شریعت کے تقاضوں کی بات کرتے ہو

ہم نے ننگے جسموں کو ملبوس حیا دیکھا ہے

ہم نے احرام میں لپٹے کئی ابلیس دیکھے ہیں

ہم نے کئی بار مہ خانے میں خدا دیکھا ہے

جتنی تکلیف ان اشعار نے پہنچائی ہے، اسکا اندازہ اقبال کے چاہنے والے بخوبی لگا سکتے ہیں۔

اقبال کی شاعری کے آگے یہ اشعار صفر ہیں، بلکل صفر۔